Sunday, March 13, 2011

الناس قبل 25 و الناس بعد 25

وانا بتفرج علي التليفزيون وبحول من برنامج لبرنامج دايما بلاقي الضيوف بيقولوا نفس الكلمة.. الناس قبل 25 غير الناس بعد 25! طيب شيء عظيم..

اما نزلت الشارع و كان بقالي كتير منزلتيش لاقيت الناس اللي بعد 25 بيرموا زبالة في الشارع من عربياتهم اللي محطوط عليها ستيكر ثورة 25 يناير و علم مصر بيرفرف من شباكها! شفت العربيات في الشارع ماشية عكسي و لو ظابط و اقف بيقولو ممنوع بيطلع من عربيتة يشتمه او يسبله و يبرطم بكلام انو احنا قعدناكوا في بيتكوا و متجيش تعمل عليا ظابط! شفت نفس الناس بيزنقوا علي بعض و بيستخدموا الكلاكس بنفس الطريقة المشينة.. أخويا راح ادارة المرور علشان يطلع رخصة لقي ناس بيميلوا علية و يقولولو 500 جنية و نخلصلك! بابا راح يدفع فاتورة تليفون البيت لقي الموظفين مشيوا الساعة 12 و أصلا مواعيد العمل بتخلص الساعة 4!!
  دا غير طبعا الشرطة اللي في الشارع فعلا لكن معظمهم قعدين علي جنب  و سايبين الشارع يضرب يقلب.. الله اعلم بقي بيربونا ولاخايفين يتهزقوا.. متعرفش!!

احب اقول ان ثورة 25 يناير مش علم متعلق.. ولا ستيكر متلزق في بيتك اوعلي عربيتك ثورة 25 قامت علي أخلاق.. أخلاق ميدان التحرير.. اللي لو مبتديناش نطبقها من دلوقتي معتقدش ان هيحصل أختلاف و تغير في مصر!
معتقدش ان الثورة قامت و ناس استشهدت علشان الناس تفضل بنفس الاخلاق.
المطالبة بالحرية مش معناها همجية.. ولا فوضوية ..ولا عدم التقيد بالقوانين!

علشان البلد تتغير لازم نتغير من جوا علشان نقدر نغير من برا..